Showing posts with label 設計師系列. Show all posts
Showing posts with label 設計師系列. Show all posts

2021/09/01

曾經是個室內設計師嘅獨立作者

尋晚瞓瞓吓覺,凌晨三點幾醒咗,突然間諗起好想寫⋯

唔經唔覺已經去到九月,短短幾個月離開咗室內設計師嘅行頭,除咗上堂教書嘅時候之外,慢慢都識得當自己係一個獨立作者(indie author),書架上嘅室內設計資料亦都慢慢下架,變成各式各樣同寫作、繪畫、攝影相關嘅嘢。

為咗講得出做得到,係收山後再次推咗三個室內設計工作(應該係最終回啦),終於第一次夏天唔洗落地盤,尤其唔洗帶住口罩係地盤"濕洗同乾蒸",真係舒服好多。以前成日坐係部大電腦面前用Autocad畫圖,用photoshop執sample board, 用word打文件;見客,傾電話,出電郵,落地盤,見師傅,傾電話,出地盤指引⋯ 而家就係另外一張工作檯用兩部細 iPad 寫書,搵資料;一大堆水彩顏料畫公仔,同埋幾本字典查生字;再返去大電腦度執相,執位,出版,網絡宣傳發送⋯

最大分別嘅係冇乜電話,可以全日好靜,如果冇開住音樂,有時由坐低直至第一次離開工作枱 (因為對眼開始攰或者肚餓,又或者口渴 :p )原來已經六個幾鐘。如果唔係要上堂同返教會,其實我真係唔多知道今日係星期幾?又或者係乜嘢節日假期。如果儲夠糧食,可以五日唔出門口,日寫夜寫,幾時瞓都得⋯生活上嘅改變都真係唔少;初時唔多適應,覺得仲攰過做設計工程,我諗,係因為冇"時限"嘅關係。

無論點都好,要改變就要學習,做乜都係咁,唔向前行,就會退步,所以我都可以話係踏上一條不歸路。當有朝一日,室內設計慢慢係我嘅專業知識層面上生疏甚至流逝嘅時候,希望相對地係寫作方面會有進展,咁我就可以寫下一個系列:做個...的獨立作家!



2021/06/21

設計師系列...還要繼續嗎?

 忽然心血來潮,都係寫埋呢幾句先睇書。係臨熄機嘅時候,突然睇到"設計師系列"呢幾隻字,腦海中突然諗起,係喎,我仲應語應該繼續寫呢個系列呢?

2021/05/08

做個放下的設計師


2021418日,星期日,晴,11:00 a.m.

 

將最後一個地盤handover 俾客人,係最後一個,正式係我卅多年嘅室內設計生涯劃上一個句號!離開地盤嗰一刻實在有唔少感觸,不過同時又有D輕鬆、興奮同迷惘嘅感覺,心情都好複雜吓;畢竟係畢業之後第一份同唯一一份職業。


呢個收爐計劃始於2017(乜咁早?),係呀!我嘅壞習慣,因為大決定我一定要一個較長嘅過渡期。仲記得當時好友勸我,駛乜咁決絕話唔接就唔接(室內設計工作)?又唔係冇經濟需要,接吓D相關嘅工作,例如淨係做設計,唔做地盤;又或者做畫圖都可以吖


老實講,如果你都係行內人,你一定會明白,做室內設計係冇得做D唔做D嘅,尤其我又唔係乜嘢出名大公司。而且淨係做一部份,個成品係好難做得完整嘅你明啦!更重要嘅係,唔完全放低,就冇辨法係人生下半場開始另一個新體驗~畫公仔書。


2017年基本上已經開始做半職設計師,同步兼職教書;係2019年正式開始畫公仔書,一切由頭學起。最諷刺嘅係我越係準備引退就繼續有客,結果都係堅持只接親戚朋友屋企,限時至2021年一月一日為止(原定時間)…終於總算勉強如願。


人生就係咁㗎啦,唔決絕就會拖拖拉拉,搞不好到死嗰一日又話有D乜乜物物心願未了云云其實乜嘢都係自己決定;我好清楚"了結"咗我嘅專業會換嚟乜嘢,有好有壞,有可以或唔可以承擔嘅狀況不過好肯定嘅係無悔!(加,唔能夠唔承認嘅不安全感)


如果你問我,咁而家寫網誌呢一刻已經差唔多"收山"左大半個月有多,係唔係好寫意咁畫緊公仔書,享受人生呢?梗係唔係啦!只可以話係正式開始斜槓族嘅低/冇收入生涯,希望七月份會有個暢順D嘅工作流程啦。不過今日,我已經冇唔捨得離開我嘅事業嗰個感覺(雖然有時仲諗緊以後填表要係職業嗰欄度寫乜?),反而係呢段短短嘅時間裏面,除咗順利完成第六本公仔書之外,

我又唔經唔覺咁重拾放低咗好耐嘅平面設計,哈哈!雖然係義工,不過真係超級"大滿足"。


所以世事難料,鼓起勇氣離開安舒區,為自已編織新一頁,呢一刻,仍然期待!


2020/09/05

做個遲多少少先引退嘅設計師

原來都有好一段日子無寫網誌了,可能係全球疫情期間有好多其他鎖碎事要理,又或者我真係唔想特登停落嚟。

唔經唔覺已經去到九月入秋,我嘅引退計劃亦都展開咗一段日子啦。家居工作室入面一箱箱嘅室內設計物料,俾我反轉再反轉,希望可以俾人或者回收,因為做呢行嘅朋友都知道,D物料好多都好鬼靚;而且有D係好難先攞得到,要丟去垃圾站,始終有D吾捨得,成日同自己講:或者第日會有用呢?結果即使唔係要引退,擺吓擺吓都擺咗好多年;到今日,都係要清走…

原本立定心意2021年1月1日會唔再叫自己做室內設計師,點知…竟然俾我遇到最後一個工程,而係無理由唔做嘅,仲要係由今年跨年到2021年中。或者係命運安排,希望好頭好尾啩😅

於是前幾日過開香港區,就順便行去久違咗好耐嘅洛克道。話說嗰日天氣極悶熱,兼且係下午兩三點,照計咁嘅環境之下條材料街冇乜人都係正常嘅,但係,嗰日俾我嘅感覺要用"蕭條"同"死寂"嚟形容。

我個人習慣係舖頭門口快速望入去,見到有吸睛嘅"料"同"人"先會再入去仔細"尋寶",不過…我見到嘅係冇開嘅舖、冇執同冇更新嘅貨丶冇表情嘅人、冇坐出嚟嘅貓.…整體感覺係好多塵嘅"灰色"!

結果,原本諗住發掘吓有咩新料/產品嘅我,只係慢速沿住洛克道由銅鑼灣行去灣仔方向落埋港鐵回歸九龍⋯

冇錯,過去年多,全球變化真係好大,特別係香港;由社會運動,疫情到全球國家宣示主權等等,全部都衝擊住每一個人。要我哋係咁疲倦嘅環境之下提起精神,有時真係講就易;冇經濟壓力同下一代嘅人都有擔心,何況係有下一代同手停口停嘅小市民呢?所以我見到嘅情景,一D都唔出奇,只係無奈。諗番起舊時嗰種人多車多,條街爆滿出貨入貨;舖頭員工同時又要照顧有無限問題嘅街客同埋,差唔多日日都見住嘅師傅.…嗰種熱鬧得嚟又有D混亂嘅good old days!

又係老鬼心態,睇完料搵間茶餐廳,強勁冷氣下一邊歎奶茶油占多,一邊八掛吓隔離嗰枱師傅呻D乜;雖然係咁細嘅空間入面,你一句我一句,嘈到拆天,但係總可以專心聽到一D趣事;呢種"特異功能"其實都係做呢行嘅"收獲"⋯又係另一種令我有DD懷念嘅日子。

講咗咁多,都係要返回現實;或者今日、今個月甚至今年、明年,大環境都未必有乜大改善,但係就正如我地幫人設計裝修咁,殘舊破爛嘅地方始終會變番完整同靚,只要肯付出同行動;所以係我寫網誌嘅呢一刻,我仍然深信,好老土咁講:希望在明天!

地球人,一齊努力啦!加油!





2018/02/24

做個兼職設計師

幾年前,機緣巧合之際,開始第一次教自在人生自學計劃入面嘅一個美化家居課程。相信好多人都認識呢個專為婦女而設嘅計劃,由政府,公開大學同一D社區中心或者教會合辦;目的當然離唔開鼓勵市民,特別係退休婦女或者主婦、新來港人士等有個持續進修嘅機會啦,最近連男生都收埋,好熱鬧。

不知不覺間,眨吓眼,斷斷續續咁已經踏入第三年教學生涯。

原本諗住係工餘時間以外,一方面認識多D冇利益關係嘅人,平衡吓生活 :D,另一方面又可以將自己熟識嘅室內設計知識同同學分享吓。初時以為已經係成人嘅同學們都係係咁意,柴娃娃搵D嘢學吓,消磨吓時間;不過真係估佢哋唔到,大部份同學唔單只唔係玩玩吓,好專心甚至好認真咁抄筆記,都令我幾意外......即係我都唔可以hea 教,要認認真真啦 :P

另外最有意思嘅係,有唔少同學係我嘅長輩,初初聽佢哋叫我一聲"老師",真係有D"唔敢當"嘅感覺;而老實講,或許真係因為係老一脫人,大部份都好有禮貌,令我突然搵番失落咗好一陣子嘅"尊師重道"感覺,好珍貴!

你估係課堂上最多人問嘅係咩嘢問題吖?(截至2017年第三個學期止)

第三位:做個升高嘅地台儲物,你話好唔好呀?!
第二位:你覺得地面做瓷磚定係木地板好呀?
第一位 :究竟牆身油漆好定貼牆紙好呢?

呢幾條差不多係我嘅必答題 :D

短短幾年間遇過唔少類型嘅同學,同埋亦親身體會到一般用家其實最關注嘅裝修疑慮;每當我見到佢哋因為學會一D新知識又或者我為佢地解答咗疑團嘅嗰種神情,感覺好滿足。特別係佢哋係完成生平第一次繪畫平面圖嘅時候,眼前一個個既驚又興奮,好似返到小學生時期嘅佢哋,真係好可愛。所以不經不覺間,我亦將更多時間投放係教學當中,我諗,係時候份正職要轉兼職啦!

由於呢個計劃,老師全部算係義務性質,所以人工或者講成車馬費更適合。加上我係遊走較偏遠地區,真係"車馬費"唔慳得,所以身邊大部份親朋戚友其實唔多支持我此舉.....不過有樣好,就係設計師總係有佢哋嘅"固執"哈哈!而佢哋都知我份人,就係咁,2018年應該會遊走於五個地區三個課程當中,享受並重新學習"為人師表"呢份"正職",期待!


2017/07/16

做個 " 愛國" 的設計師

2014年10月26日, 發放了一篇 做個有承擔的設計師, 把好不容易累積了的中國流覧本網誌數量付於流水.可惜, 但無悔.

今天, 終於把流量稍為穩定, 更剛剛發佈了"可可雜貨舖", 在期待着吸引多些讀者之際, 我還是決定要寫這篇網誌; 即使, 我的期待或許將要再次落空.

 剛剛在電視上看了一個關於劉曉波先生的特輯.那一刻,我竟然能感受到身為"中國人"對國家没有看待人權, 人民沒有真正自由的那種傷痛, 真的很痛!!!

一個帶着崇高理想, 以和平心態去期待國家變得更好的學者; 卻為此而賠上自己, 甚至最愛的一生,  値得嗎? (我敢説在他心中一定認為値得!)

自問對什麼政治, 國家...不算熟識; 但人權, 自由, 理想和愛, 是正如你我一様, 天生便懂得, 也應該可以隨時享用. 可是, 在2017年的世代, 中國在高舉什麼一帶一路, 讓全國接軌的同時; 另一邊廂卻仍然像"野蠻人"一樣. 思想守舊, 腐敗, 專横...視人命如草芥!


劉曉波先生和劉霞的付出, 其實, 這オ是真正的愛國, 只是國家不愛國民罷了. 

以言入罪, 軟禁, 網絡封殺, 囚禁異見人士......這一切並不會隨着他的離世而終止; 但可以肯定的是, 人可以被囚, 心卻不可以! 只要有這個信念, 他(們)的付出必不會白廢!

2017/02/07

不想做個"機關"算盡的設計師

啱啱教完上一季嘅興趣班, 同學們例牌會問嘅問題係: 
1) 係房起個地台擺嘢好唔好? 
2) 升高張床下面做衣櫃書枱好唔好?
3) 張睡床摺上摺落好唔好?

通常我都會答: 
如果唔好收埋咁多無謂嘢, 善用空間, 上面三個問題嘅答案就梗係"唔好" 啦!

不過時而世逆, 可能因為"納米樓"嘅出現, 以後想唔好都唔得啦!

前排係會展見到一個展覽, 其中一D室内空間運用亦係因為住屋面積愈嚟愈少而設計嘅. 例如張睡床要行完好多級唔啱人體工學嘅"儲物樓梯級"先可以去到. 又話者你哋係電視上都會見到嘅"厠所浴室門共用"方案; 梳化下面暗藏浴缸(當然係放係客廳啦)...等等. 將來我哋呢行嘅前景(以住宅設計而言) 就會變成設計"機關" 主導.

我諗新嘅物料, 家具小五金用嚟整"機關"配件, 空調抽風系統亦都會相對革新. 短期内應該會令市場有D新鮮感, 甚至會造就好多主打呢類樓盤嘅新興設計師; 不過無論係對用家同設計師嚟講, 長遠嚟睇絶對唔係好事.

一個原本可以簡單舒適嘅家會變成好複雜同忙亂, 例如突然覺得凍想攞件衫都可能要: 先執番枱面D嘢, 摺番埋張枱, 泊番隻浴室門, 同衣櫃(如果仲有的話) 前面做緊其他嘅家庭成員貼身調換位置之後, 先去到其實只係距離不到6呎嘅目的地完成"任務"......要返回原位繼續工作.....(請自行逆轉動作一次)......希望呢個惡夢唔會成真.


2016/10/26

做個重新上路的設計師

"有人辭官歸故里,有人漏夜趕科場!"我諗,我正處於呢個狀態。

可能好多人都會有同感,尤其係做設計嘅人:做到想轉行,但係又唔知轉邊行好?始終一個做到上哂手,累積咗大量經驗,人脈及相當收入嘅工作係好難放棄嘅。不過時移世逆,越嚟越多嘅工種因着科技及需求而改變。

零售租約愈縮愈短, 流動辦公室嘅工作模式, 住屋空間愈嚟愈細, 師傅人工愈加愈貴...... 等等,仲有各式各樣嘅原因都令我覺得係時候準備辭官歸故里。

所以係另一邊廂,就想試吓可唔可以趕入設計布藝這個"科場"?!

其實早係十年前已經嘗試係Spoonflower設計布欵(因為成日揾唔到一D啱心水嘅布欵俾客人用),但係一方面當時佢哋 啱啱成立冇幾耐,支援好少; 而我哋又忙緊正職,所以只係隨意設計咗十幾欵就擺低, 估唔到呢粒種子到今時今日又可以重生。

十年人事幾翻新, Spoonflower 今時今日已經發展到好大,唔少平面/布藝設計師已經係常客,而我,就係一個初哥!雖然因為從事室內設計會對布料及製作軟件有一定認識, 但係今次當我認真對待嘅時候,就發覺要設計一D市場受落又唔太"行"嘅布藝,係當中大有學問……所以, 呢個就係我要重新投入同學習嘅一個教室。

雖然要投放嘅時間,資源同心機肯定唔少, 但係身為設計行業嘅人,唔多唔少都會有份勇氣去嘗試同發掘新可能性嘅心態;期望有一日可以擁有一個CocoaDesignLife 品牌嘅"可可布館",設計出一D較有個性嘅室內布藝。或許,呢個都係另一個職場上嘅延伸都未定?

短短半年嘅時間,令我對網上銷售有多D了解; 重新再強化自己嘅攝影技巧,平面設計,混合媒體及至Photoshop 嘅運用係必需嘅。所以話世界上永遠冇學得完嘅事物,亦唔可能會悶,只要你肯向前行出一步,奇妙旅程又再度展開!


banner graphic of Cocoa Design Life of Spoonflower shop
可可布館


2016/09/19

做個氣定神閒的設計師

話説最近呢幾年有幸參予一D成人興趣班嘅教學. 有同學覺得我(好似)好斯文, 奇怪我點同師傅溝通仲可以支持佢哋D "問候語"?

首先要澄清唔係個個師傅都咁"粗皮"嘅, 尤其而家, 好多都好斯文有禮. 我同同學講, 如果想係裝修期間大家做得開心, 令工程順利完成, 有三個人好重要:-

一個將心比己, 明白事理 嘅顧客
一個有專業操守, 氣定神閒 嘅設計師
一個細心老實, 尊重自己行業嘅師傅

當然, 時間/ 金錢/ 各方面嘅能力就不在話下喇. 始終一個住宅裝修工程由設計到完成分分鐘搞成五六個月; 除咗要兼顧大小事項之外, 突然期來嘅問題都唔少. 基本上顧客同師傅都承受一定壓力.

所以, 如果身為設計師嘅我哋唔能夠凌駕壓力, 毎次落地盤都令氣氛變得過份緊張, 搞到D師傅好似樣樣都做得唔好咁, 係"委屈"或"不被尊重/信任"嘅感覺下面, 好難令整件事美滿咁完工.
而我認為氣定神閒 嘅設計師擔當好重要嘅角色, 因為我哋係顧客同師傅嘅橋樑. 經驗話我知如果我哋可以心平氣和, 恰如其份咁處理整個工程運作, 好多時D問題都係可以解決到嘅.

雖然要集齊以上三個人辧, 有時都要靠彩數, 咁我就祝願大家好運啦!

2016/08/02

做個自給自足的設計師(二)

首先必需向大家道歉一聲, 原來轉眼又一年多了. 生活上不能自控的變化也就是我們這些業餘博客所遇到的最大問題; 如果你是一個"自給自足的設計師", 被逼暫停"副業" 更是無可避免的; 畢竟...要生活嘛 :D

希望你仲記得上年呢篇網誌(一), 老實講, 我都要睇番先記得自己寫過咩??
"自給自足"係一段日子之後己經唔多適用係室内設計師身上, 如果你要佢學呢學路仲要自己攪, 真係睬你都儍. 一係叫公司發俾 Freelancer, 再唔係就師傅自己地盤搞掂. 

返工一定準時收工, 唔想亦唔期望升職, 去學點樣有效快速咁捉多隻精靈好過. ..我諗, 咁會啱聽D. 

點解我唔想繼續寫點様自給自足法呢? 一方面係社會環境, 客人需求同新一代年青人係心態上都改變咗好多. 係有限時間入面揀去做D咩同學D咩, 已經唔係咁理性. 要去趕科技, 例如3D 打印, 環保物料應用; 調較人際關係去改善見客或者工程管理等等... 似乎學得嚟又有新嘢, 面對面遘通更加係最無興趣, 既然對呢行無慾無求, 咁又何必搞咁多呢!

不過聽完以上一段"現實感歎" 之外, 又唔好太灰. 因為有部份無論係在職或者打算入職嘅一群, 仍然好有心想學多D, 做個全面一D嘅設計師. 不求人或至少危急時自己都頂得住嘅DNA仍然會令佢哋至終擁有自給自足嘅條件, 絶對會係終極求生嘅優勢, 加油!!!

2015/05/05

做個自給自足的設計師(一)

老實講,要做一個自給自足嘅設計師,講就易,真係要自給自足,都幾頭痛!
或者好多人以為室內設計師淨係識基本人體工學,畫吓公仔圖,買吓嘢,襯吓色,"大"吓師傅就得啦! 唔...我唔排除有呢一類又生存倒嘅同行;不過我講嘅係真嗰D,加上係自由人,冇公司其他同事支援嗰D。

其實室內設計涵蓋嘅範疇好廣泛,既然係同生活有關,時下流行或者新發賣嘅產品,物料甚至科技係有需要認識嘅,如果唔係,我哋同用家溝通嘅時候就比較困難。除咗咁之外,新軟件嘅功能幫到我哋自由人好多,由2D 到 3D ,如果揾啱嚟學同用,係創作同 present 嘅時候就事半功倍啦!注意: 係要“ 揀啱"。

另外,唔好以為室內設計屬於立體空間嘅嘢,嗰D graphic 呀,商標字體嘢就唔關我哋事。如果我哋係平面設計上有多D基本知識同運用技巧,你係設置wall graphic 同幫人掛招牌甚至掛畫嘅時候, 就唔會同出面嘅 banner 店生產出嚟嘅一樣。

如果再識埋攝影,我講嘅唔係隨時影1000 幾百嗰D儍瓜數碼攝影,而係會考慮光影,構圖色溫同曝光嗰D。咁...你係室內燈光設置嘅方便亦都會有D心思!

仲有乜嘢呢?呀!如果可以花D時間學吓享受音樂,藝術, 電影同係睇書上面; 慢慢,呢D都會不知不覺間影響咗我哋係設計嘅時候對色彩同感觀嘅要求·

唔。。。係唔係覺得自己多咗少少內涵呢?!

不過,呢D都係屬於設計師本身想唔想係自己身上投放嘅"不求人"資源,絕對要時間同心機; 睇完一大堆"疑似道理"之後,或者你會覺得唔想咁麻煩,大把其他嘢要做,咁。。。 

無錯,每樣嘢揾外援,即consultant 公司幫手就搞掂,亦唔駛再花時間睇下一篇,因為所有問題已經唔係問題啦,淨低只會係錢嘅問題啫 :p

2014/10/26

做個有承擔的設計師

好唔容易先累積到幾萬溜覧人次, 加上最近冇咩寫嘢, 我諗萬一寫完呢篇被封, 咁未前功盡癈?
但係身為一個設計師,成日話要有自由嘅空氣先可以生存; 仲要係土生土長嘅香港人, 點可以係香港而家正處於大事大非嘅時候, 唔表示一吓呢?


2014年9月28日, 香港

中學生為着爭取普選特首於9月22日開始罷課. 26日佔領公民廣場.
9月28日戴教授啓動和平佔中, 部份學生及市民開始在金鐘靜坐, 人數愈來愈多.
同一晚, 政府用胡椒噴霧及八十多個催涙彈瘋狂地把和平示威者驅趕.........
結果激起不少市民的正義感, 運動由金鐘推擴至銅鑼灣, 旺角及尖沙嘴.

呢晩, 黄絲帶係臉書上變成好多人正義嘅化身. 凌晨時份我見有四個同學仔係我屋企對面條欄桿密密掛上一條一條嘅黄絲帯, 係暗淡嘅街燈之下隨風擺動...好靚! 心諗, 香港由呢一刻開始。。。。。。不再一樣! "雨傘運動 Umbrella Movement"亦隨住示威者用雨遮抵擋"驅趕武器"而誕生。

從來都唔覺得設計人要所謂嘅正治中立, 冇錯,政治嘅嘢真係好鬼悶,但係如果連學生都緊張,關乎公平,公義,自由,人權嘅未來,我哋仲扮咩"正治中立"?攞少少做人基本嘅良知出嚟,是就説是,非就説非。比起D學生,唔通連呢最少嘅表態同支持,我哋都做唔到咩?


 一個基本嘅要求,唔應該要咁多涙水、甚至血汗嚟換取,更唔應該由學生去承擔。或者你會覺得我哋D老鬼,做咩重要理埋D未必享受到嘅未來抗爭運動?舒舒服服有錢搵,有車有樓有老婆加條狗,政府話乜未乜囉!最緊要唔好因為呢D"少衆嘢"同D老細或者D Friend 反面。

"時窮節乃現  一一垂丹青。。。正氣歌文天祥

我諗,呢幾隻字,正係而家嘅寫照。(註:在時勢環境很差之時,一個人有沒有氣節就在此時表現出來,亦會一一在歴史上存留)


仲有兩日,雨傘運動就已經一個月大,亦都由本土運動發展為全球關注嘅普世價値。由静坐到通宵紮營,由學生喚醒真心愛香港嘅良心市民,由市民激勵不再沉睡於安逸或妥協於政治環境嘅公務員,新聞從業員。。。一切一切,始於赤子之心。


呢個運動會成功嗎?"

係未即刻有真普選我唔敢講,但係我覺得個運動已經成功咗!


註:圖片取自Scholarism ,亦可連結査看更多雨傘運動的内容及進展。


2013/10/01

做個懂得"let go"的設計師


自古以來, 無論邊一行嘅設計師都係比較執著, (雖然我唔知而家重有冇咁嘅設計師?!) 無論係比例、物料質數、燈光效果、結構細節等.....都會有某程度嘅標準同要求.

好多時會聽到啲客話"唔緊要啦!差少少色,分別唔大, 係你先覺得啫, 其他人唔覺嘅,冇問題喎!"又或啫師傅會話"個圓位大咗少少啫, 椅背又矮咗啲啫, 都係凳一張, 唔好改啦!".......等等. 以前我都會堅持要改番好, 唔知就話啫, 又唔係做唔到, 樣樣差少少, 成個設計最後未走哂樣? 改!

又例如好多時客人都會有啲個人喜好或者情義結,好似唔理有冇空間都要擺一張"水牛肺"梳化; 即係高背,極大張, 造工極粗糙, 毫無細節,連基本梳化型都維持唔到; 總之係一大堆牛皮嘅嘢.(對唔住! 激動咗少少, 因為眼見有太多人跌落呢個陷阱.)勸極都唔聽, 幫佢搵咗張又平又靚又唔會過時, 大方得體嘅梳化, 結果都係要買番"水牛肺". 如是者......我開始自我反省.

今日, 我仍然會好慎重, 好認真咁對待同提醒我啲客人, 好堅持咁要師傅改嘢, 但係堅持到某個極限我就會"let go"! 好似有啲悲哀, 不過如果唔放手嘅話, 一個膠著狀態都係做唔成事, 維有盡力而為啦!

但係偶爾都會有奇蹟出現, 就係客人見我"let go"果一剎那, 佢哋會突然清醒咁同我講 "都係跟你意思做啦!" 到今日我都唔係太明白點解會咁突然, 唔通係我個樣太似想"放棄"佢哋? 唔, 又要反省吓啦.......

2013/03/06

做個寧缺勿濫的設計師

無論係住宅定係商舖, 係任何設計之前都離唔開同客戶傾吓用家要求; 例如有幾多人用, 咩嘢人 ?即係一家有老有嫩定係只得兩口子; 商舖就變成幾多職員, 咩嘢目標客...等等. 最緊要嘅莫過於係儲存問題, 要擺啲咩嘢, 擺係邊, 擺幾多...?

係香港呢個地貴人多嘅地方, "愈多愈好" 就成為標準答案, 於是...問題嚟啦! 所有空間都要你填滿, 原本可以用嚟設計成一個較有味道或者優閒嘅小區都會變成係奢望. 商舖客因為基於高昂租金, 要舖盡其用, 又唔係係度瞓, 呢點仲可以理解. 但係住宅嘅話, 我哋都係希望用家可以先考慮減少自己以為"珍貴" 其實係無謂嘅收藏; 寧願果個位冇嘢擺, 都唔好搵啲"收藏"+個櫃嚟充塞.

另外一個較多發生係住宅嘅問題,尤其係新婚, 覺得入伙之前一定要咩嘢都齊晒, 就算未搵到啱心水嘅嘢, 例如吊燈, 掛畫, 餐枱...都是但買件填咗個位, 結果出嚟嘅效果, 未必係最差, 不過一定唔係最好!

事實證明, 肯聽話又認同寧缺勿濫呢個手則嘅客人, 結果係除咗可以享受由設計創造出嚟嘅舒適空間之外,等到最合心水嘅傢俱配置, 仲可以經驗到從等待, 心思熟累之後搵到一件有真正存在需要, 值得放係屋企朝夕相對嘅物件; 呢個先係我地認為最美滿嘅大團圓結局.




2012/06/29

做個無悔的設計師

個題目好似沉重咗啲,不過適逢七一將至,實在不得不令我又再思考係呢十五年國家“領導”下,身為設計師嘅我哋,究竟做口咗啲咩?

設計需要有自由嘅土壤去作為基礎,如果冇,世上就唔會有創作空間,我唸呢樣大家都好明白.以往我哋呢類人多數都對政治冇咩興趣,無論係辦公室政治或者係社會上嘅政治,總覺得只要冇人限制我哋做咩同唸咩就得啦...真係冇?

“基本法廿三條”,“網絡廿三條”,電視新聞/報紙嘅選擇性報導,高鐵事件,領匯事件,谷歌事件,普選問題,人權問題,各式各樣嘅壟斷情況,禁呢樣禁嗰樣...幾時我哋變得咁無知,咩嘢都要“人”管,要“人”教,連辛苦搵番嚟嘅錢都強迫要比人扣起,係要你去“投資”!

你仲覺得我哋嘅自由土壤好穩陣?如果你覺得只要仲係設計行而又搵到食就懶理週圍發生緊咩事的話,又或者覺得用七一遊行去提醒國家我哋係有自由意志嘅人=無聊搞事;咁我寧願任你話都要係香港仲有機會發聲嘅時候行出一步,做個無悔的設計師(香港人).

2011/09/01

做個無奈的設計師

心中有 一堆永遠解答不到的問題, 也許各位可幫幫手.

點解咁多人鐘意入住有酒店式大堂嘅住宅? 但係其實番緊自已屋企!

點解要住有會所嘅屋? 但係自已日日番咗工, 要放工或者假期先可以同全幢大厦或屋苑嘅人爭用會所設施!

點解要將十呎樓底唔夠嘅樓變成歐洲式古典設計? 仲要大厦用緊鋁窗!

點解要買咁多唔同種類嘅名師家具系列放喺個廳, 攪到好似陳列室咁?

點解屋企嘅設計要追上潮流, 一定要用今年流行嘅物料同顏色? 咁下年點算!

點解主人房連擺張大啲嘅床都唔夠但係就一定要有主人房套厠浴室?

點解電視機後面幅牆一定要特別物料, 有"啲嘢睇"?

點解冇細路同狗仔貓仔地面都要舖瓷磚?

點解冇人煮飯但係啲廚房設備咁齊備同咁高級?

點解浴室有位都唔用浴缸要用企缸, 留番個窿做乜?.....

我想答案是, 只要我不是住客, 這一切也不是問題. 真正問題只是當我要為客人按以上要求設計時, 唯有........不要問,只要做!........

2010/08/02

做個設計師(下)

上回談了一些關於做設計師要考慮的狀况, 你可能會發覺我所說的是圍繞着一個室內設計師而言, 其實除了工作範圍會因應個別設計類型而有所分別之外, 大家所面對的壓力和困難也是大同小異的, 所以我還是以比較熟識的一行作為範本.

準備好了嗎?

2010/07/27

做個設計師(上)

設計師 - 有型, 自由, 瀟灑, 人工高, 每天遇到的盡是美麗事物, 多令人羡慕的職業啊!......請問閣下對這個千年誤解是否已經明瞭箇中實況, 還是仍然嚮往?